"الرجولة ومعتقداتنا"
بيدور في دماغك مفهوم الرجولة (الجدعنة، الشهامة، القوة، السيطرة،التحكم، الكلمة المسموعة، الحكمة)
كلام كتير بيصوف الرجولة لكن معظمة مش حقيقي ومش موجود وانقرض من زمان.....
الرجولة دلوقتي بقت الراجل إلي يشخط وينطر وألي كلمته مسموعه والامر الناهي ليه هو بس، أنا راجل...
الرجولة بقت الراجل إلي بيصرف أين كان اخلاقة، أسلوبه، المهم إني راجل وبصرف علي البيت...
الرجولة بقت الواد الحمش إلي مسيطر ودابح لمراته القطة ومتحكم فيها حتي في الهواء إلي بتتنفسه...
الرجولة بقت الشخص إلي يقعد مراته من شغلها، مفيش شغل يا هانم، إنتي عاوزة تبقي رأسك برأسي لا طبعا دنا راجل.
الرجولة بقت الشخص إلي يمنع مراته أنها تكمل تعلمها وتاخد شهادة وتطور من نفسها، أنتي عاوزة تكوني أحسن مني، هتعملي أي بالشهادة وأنتي آخرك المطبخ...
الرجولة بقت الزعيق والضرب والشتايم بابشع الألفاظ ما أنا راجل...
الرجولة بقت الشخص إلي قاعد في بيته تحسه جاي فندق ساعتين ومروح، ممنوع يساعد مراته، ممنوع يذاكر للولاد ويتابع أخبارهم، قاعد في البيت ماسك الرمود يشوف الماتشات وكل خمس دقايق عاوزة قهوة عاوز شاي بقا صنعي ولازم نخدم علي جنابه......
الرجولة بقت الشاب الدنجوان إلي يعرف بنات بشعر رأسه وتساله بتعمل كدا ليه أصلي راجل واعمل إلي أنا عاوزة، جتك داهيه فيك وفي رجولتك....
الرجولة بقت نخبي مشاعرنا ومنعيطش وننهار مع إن دا حقك الطبيعي وحق نفسك ليك....
الرجولة بقت مينفعش نشكر أي حد قدملنا حاجه حتي لو كوباية ميه أحسن ياخد علي كدا..
الرجولة بقت اقلل من زوجتي قدام الناس واروح اتريق مع صحابي عليها وافضل ازعقلها عمال علي بطال وكانها عبدة عندي مش إنسانة بتحس...
الرجولة اتشوهت وبقت معانيها مزيفة والناس إلي نفسهم يبقوا رجالة بجد مش قادرين.....
الولاد عموما اتربوا إنهم متاح ليهم يعملوا إلي هما عاوزينه بحجه أنه راجل...
من حقك تشتم أختك الكبيرة وتزعقلها.
من حقك ترفع صوتك في البيت وتثبت رجولتك.
من حقك تصاحب بنات، ما أنت راجل.
من حقك ترجع متأخّر براحتك.
من حقك تتعلم واختك لا.
من حقك تتطلب إلي أنت عاوزة واحنا هنعملهولك عشان أنت الراجل..
لكن دا بيخلق فرعون علي هيئة إنسان، مش بيحترم حد حتي أخواته هيحترم غيره إزاي، بيصاحب بنات وماشي مع طوب الأرض هيؤتمن علي زوجه واولاد إزاي، ميعرفش يجيب لنفسه كوباية هيقدر يقدر قمية إلي بيتعمل عشانه، هيقدر تضحية الانسانة إلي مشاركة حياته بالتأكيد لا طبعاً.....
عشان كدا كل إلي فات دا ماسموش رجولة اسمه ذكر وليس رجل، لان الرجولة معناها أعمق واسمي وارقي من كل دا...
الرجولة هي الجدعنة، الشهامة، الاحترام، التقدير، الحنان، إنك تكون سند لاقرب حد ليك، إنك تكون داعم وقت الشدة) شفت الفرق كبير جداً...
الرجولة الحقيقة إنك تكون مخلص مع نفسك ومع غيرك..
مقدر قيمة العمل إلي بتبذله زوجتك عشانك وعشان ولادك، إنك تقدملها كلمة شكر بسيطة علي أبسط حاجه بتقدمها وغير كدا تشارك معاها علي قد ما تقدر،مقدر أنها إنسانة زيك وعندها مشاعر وزي ما هي بتقدرك مفروض تقدرها....
إنك تدعمها تكمل دراستها وتنجح وتاخد الشهادة إلي هي عوزاها وتشتغل وتكون أكبر داعم ليها...
إنك تكون سند وقت الأزمات والشدة وتكون داعم نفسي قوي، إنك تحترم عيلتك واخواتك ودراستك ومتلعبش بمشاعر حد لأن كما تدين تدان.....
آخر حاجه إنك تعبر عن مشاعرك الفطرية بشكل سليم وتسمحلها إنها تتحرر، لأنك إنسان ودا حقك..
أنت من حقك تختار عاوز تكون أي، راجل بجد ولا مجرد ذكر........
"اوركيدا 🍁"